Ankahe Afsaney

Aankhon ki adhkhuli kaliyon mein
Shabnam ke kuchh qatrey qaid hain
Raat ke ankahe afsane liye;
Dur kahin fizaon mein
Sehar apna aanchal jhatakti hai
Aur khwaab ke rangeen moti
Harsoo bikhar jate hain
Aur intezaar karte hain ke
Kab neend ki pari unhey samet kar
In adhkhuli kaliyon ki vaadi mein Utaregi
Aur kab
Palkon ki reshmi jhalar uthaney ke baad
Phoolon ka chaman hoga
Jahan phaili khushboo mein
Hazaaron dastaanein mahfooz hongi

Woh qamar aur main ghubaar, phir bhi us ki aarzoo hai
Kar doon gumaan ko yaqeen, yeh meri khoo hai .

Aata nahin hai naam khezaan ka bahaar mein lekin
Khezaan se hi chaman mein bahaar ki aabroo hai

Jaane kitni raatein tamam huin roz-e-vasal ke intezaar mein
Umar ki dilkashi to guzar gayi baqi uski justujoo hai

Bahaarein to kab ki mit chuki hotin jahan se
Gulshan mein in ko sametey huey to teri rang-wa-boo hai

Daagh-e-sajdah terey aastaney se na mila to kya
Tere hi naam ka vird hoga jahan jahan gira mera lahoo hai

Ek Dua

Chaand ki thandi kirano mere sanam ko khwaabon ki duniya mein le jaana;
Sitaron us ke roshan rukh pe jagmagaana;
Naseem dheerey se us ki zulfon ko chhoo janaa;
Gul apni naazuki us ke labon pe chhod janaa;
Lail apney aanchal se use sahlanaa;
Khushboo us ke pekar mein bas janaa;
Fiza apni mastiyaan us pe lutaana;
Shabnam uski palkon pe dheerey se aana;
Usey kya khabar
Is shab-e-firaq ki Jo mujhe meri khwaabgaah mein liye jaa rahi hai
Jis ki tareek gahraaiyaan
Rahengi roshan hameshaa
Mere chiragh-e-dil se;
Hawaa us se kuchh na kahnaa
Khaaq usey meraa nishaan na bataana
Tabassum us ke hoton mein bas janaa
Aur us ka haath
Sehar ke haath mein de denaa
Jo aaftaab ko Liye sirf uski muntazir hai……

Jis ne kabhi sang ka murasim parastish se tha jod diya
Jaane kyon aaj khud usi ne booton ko tod diya

Likkhe hum ne uskey afsaane zamin se falak tak
Ek apni zeest ka hi safha khaali chhod diya

Hai phaili teri dastaan sitaaron se bhi aagey
Jaane kya hua ke aaj zamin ne uthh kar falak mod diya

Chhayi rahegi surkhi baghon mein ta qayamat
Ab khezaaon me bhi kisi ne apna khoon-e-jigar nichod diya

Samandar ki syaahi se jo likhne baithhe teri daastaan
Ek waraq ke baad syaahi ne qalam ka saath chhod diya

Na arsh ke paar hi koi makaan apna hai
Na zamin apni hai, na asmaan apna hai

Kahkashaan wa qausqazah kho gayin zamin taley
Asmaan bhi toot gaya, ab sirf tu hi meharbaan apna hai

Waqt ke chehrey pe zakham hain jaane kitne
Ainaa bhi dhundhlaa hai, milta nahin koi nishaan apna hai

Jo aayee fasal-e-gul is baar to hursoo thi teri hi khushboo
Ghunchey terey, baharein teri, tera hi gulistaan apna hai

Hazaron dastaanein likhee gayin jis key seeney pe
Aaj us bekas zamin ka na koi qadardaan apna hai

Jo karo is syaah raat mein koi mashaal roshan
To shararey apney hain, aatishfishaan apna hai

Jo mod do rukh tez aandhiyon ka
To Safar apna hai, caravan apna hai

Azmaish

kaagaz ki kashti bhi bin baadbaan
Sharyaano mein ubalta hua toofan
Aaj hai azmaish kis ki yeh
Samandar khamosh, sahil hairan

Safar

Chaman abaad kar bhi koi uska muqam na hua
Hawa ke dosh pe bhi koi uska qyam na hua
Toofan to saarey tham gaye lekin
Safar is musht-e-ghubaar ka tamaam na hua