zindagi to nazar kar di bazam-e-dawat-e-ahbaab ko
Naama-e-amaal pesh kya karoge roz-e-hisaab ko?

Hai kya meri hasti is wasee jahaan mein
Kabhi main khaaq ko dekhoon to kabhi habaab ko

Tere qadam hi to liye jaate hain dashte sehra mein
Kyon ilzaam jaye hai satrangey saraab ko?

Chasham-e-tar to bedaar hogi kisi aur jahaan mein
Chhod chali musht-e-ghubaar is jahan-e-kharaab ko

Zindagi se is zindagi mein milna dushwaar hai bahot
Khwaab hi rahney do is anjaane khwaab ko

Amber ki vasaton mein noke-qalam dubo kar to dekho
Alohi daastaanein saheefe mein sanjo kar to dekho

Resham aur makhmal ke beech zindagi ke zakham dekhoge kaise
Kabhi apne hi dil ko apne hi haatho lahoo kar to dekho

Shab ki teergi ko roshan karne wale to hain bahut
Tum din ki taariki mein ujaala harsoo kar to dekho

Sadiyon se man raha hai jashan-e-adaam zamin ke seene par
Kabhi is ke labbastaa fughaan mein khud ko dubo kar to dekho

Raat ke ashkon ka mafhoom sirf shabnam tak hi nahi mahdood
Aur bhi raaz ayaan honge in motiyon ko saanson mein piro kar to dekho

Rooh ke nehaan kone mein koi saagar machalta to hoga
Daagh-e-daaman kabhi isme dho kar to dekho

Khushboo chali hi aayegi dast-e-saba ke saath
Bikhre khwaab bhi aankhon mein sanjo kar to dekho

Woh qamar aur main ghubaar, phir bhi us ki aarzoo hai
Kar doon gumaan ko yaqeen, yeh meri khoo hai .

Aata nahin hai naam khezaan ka bahaar mein lekin
Khezaan se hi chaman mein bahaar ki aabroo hai

Jaane kitni raatein tamam huin roz-e-vasal ke intezaar mein
Umar ki dilkashi to guzar gayi baqi uski justujoo hai

Bahaarein to kab ki mit chuki hotin jahan se
Gulshan mein in ko sametey huey to teri rang-wa-boo hai

Daagh-e-sajdah terey aastaney se na mila to kya
Tere hi naam ka vird hoga jahan jahan gira mera lahoo hai

Jis ne kabhi sang ka murasim parastish se tha jod diya
Jaane kyon aaj khud usi ne booton ko tod diya

Likkhe hum ne uskey afsaane zamin se falak tak
Ek apni zeest ka hi safha khaali chhod diya

Hai phaili teri dastaan sitaaron se bhi aagey
Jaane kya hua ke aaj zamin ne uthh kar falak mod diya

Chhayi rahegi surkhi baghon mein ta qayamat
Ab khezaaon me bhi kisi ne apna khoon-e-jigar nichod diya

Samandar ki syaahi se jo likhne baithhe teri daastaan
Ek waraq ke baad syaahi ne qalam ka saath chhod diya

Na arsh ke paar hi koi makaan apna hai
Na zamin apni hai, na asmaan apna hai

Kahkashaan wa qausqazah kho gayin zamin taley
Asmaan bhi toot gaya, ab sirf tu hi meharbaan apna hai

Waqt ke chehrey pe zakham hain jaane kitne
Ainaa bhi dhundhlaa hai, milta nahin koi nishaan apna hai

Jo aayee fasal-e-gul is baar to hursoo thi teri hi khushboo
Ghunchey terey, baharein teri, tera hi gulistaan apna hai

Hazaron dastaanein likhee gayin jis key seeney pe
Aaj us bekas zamin ka na koi qadardaan apna hai

Jo karo is syaah raat mein koi mashaal roshan
To shararey apney hain, aatishfishaan apna hai

Jo mod do rukh tez aandhiyon ka
To Safar apna hai, caravan apna hai